Zero casualty kang Tisoy gitinguha

CEBU, Philippines —  Gitinguha sa mga sakop sa City Disaster Risk Reduction Management Council sa  Dakbayan  sa Lapu-Lapu  ang zero casualty hinungdan sa ilang higpit nga pagpangandam.

 Si Nagiel Bañacia nga maoy  pangulo sa buhatan CDRRM miingon nga  walay klase ang mga tulunghaan gisuspenso usab ang paglawig sa mga sakyanan  sa kadagatan  paingon sa kabarangayan  sa Isla sa Olango sugod pa niadtong  Domingo sa hapon hangtod niining mga higayona.

Samtang naghimo usab  og susamang  pagpangandam ang kagamhanan  sa Dakbayan  sa Mandaue  pinaagi  sa pagpahigayon og panagtigom nga gitambongan sa kapolisan,  kabomberohan, mga department head ug CDRRMO nga gipangulohan ni  Felix  Suico.

Naglakip sa ilang gibantayan ang mga barangay nga dali makasinati og mga pagbaha ug pagdahili sa yuta.

Samtang ang Talisay City, nag-umol og Search and Rescue (SAR) team ang kapulisan aron makatabang sa lokal DRRM team sa siyudad sumala pa ni  Police Major Gerard Ace Pelare.

Ang pangu sa Talisay City Police Station nagkanayon nga normal gihapon ang ilang operasyon apan magpatrolya ang mga polis aron maniid sa panahon ug sa palibot.

Ang SAR team moresponde kun dunay mga maapektahan sa bagyo.

Samtang si Mayor Gerald Anthony “Samsam” Gullas Jr. nipagawas og direktiba sa pagkanselar sa klase sa pampublikong tunghaan. Ang mga administrador sa mga pribadong tunghaan mao nay modesisyon base sa ilang pagtan-aw sa panahon.

Sa pikas bahin, naka full alert na ang Cebu City Police Office subay sa mando CCPO Officer in Charge Police Colonel Geovanie Maines alang sa pagpangandam sa bagyo.

Ang mga police stations gimandoan pagmonitor sa ilang hurisdiksyon ilabi na ang mga bukirang barangay ug coastal barangays. IBM (FREEMAN)