Mag-uuma gipusil patay sa silingan

CEBU, Philippines — Patay ang usa ka mag-uuma human kini pusila sa iyang silingan diha sa Barangay Langub, Lungsod sa Asturias niadtong Sabado sa buntag.

Ang biktima mao si Antonio Claro, 40-anyos, minyo samtang ang suspetsado mao si Rolando Patigayon 39, minyo usab ug parehong mga mag-uuma ug pulos residente sa maong dapit.

Matud ni Police Staff Sargent Bendie Nuñez, desk officer sa Asturias Police Station nga dugay na nga nagkabangi ang duha.

Si Nuñez nagakanayon nga giingong ang biktima magsige og pangita og away hinungdan nga wala na makaagwanta ang suspetsado ug napusil niya kini gamit ang paltik nga kalibre .357 nga revolver.

Ang biktima nakaangkon og mga samad pinusilan sa nagkadaiyang parti sa lawas nga giingong maoy hinungdan sa iyang kamatayon.

Ang suspetsado human sa hitabo boluntaryo kining nitahan sa iyang kaugalingon ngadto sa Asturias Police Station. (/BDB)(BANATNEWS)