Presyo sa palaliton gibantayan sa DTI-7

CEBU, Philippines — Nagsugod na sa pagpaniid ang Department of Trade(DTI)-7 sa presyo sa tanang batakang palaliton ug kadtong mga nag-unang palaliton dinhi sa Sugbo pinaagi sa gihimong inspeksyon nunot sa nagsingabot sa kapaskohan.

Ang DTI-7 nag-monitor sa mga tindahan kun nisunod ba sila sa Suggested Retail Price (SRP) labi na karon nga nagkaduol ang Yuletide season.

Duha ka supermarkets sa Siyudad sa Sugbo nga ilang gisusi nakita nga wala sila nag-overpricing kay nituman sila sa SRP nga gipagawas sa DTI.

Apil sa gisusi ni DTI-7 Regional Director Aster Caberte mao ang presyo sa mga Noche Buena items uban pang nagunang palaliton ug gikinahanglan sa publiko.

Ang mga Noche Buena products nga gisusi gilangkuban sa cocktails, cheese, manok, ham ug all- purpose creams.

Gisusi sab nila ang mga presyo sa basic commodities sama sa sardinas ug tubig. Gikalipay ni Caberte nga nisunod ra sa SRP ang mga supermarkets. Gani sa Colonnade sagad sa ilang mga produkto ubos og three percent sa SRP.

Bisan og dunay mga brands nga wala maapi sa SRP apan gipasabot ni Caberte anaa sa mga kunsumidor ang pagpili og laing brands nga mas barato.

“Malipayon ko because the prices points in both establishments are much lower than the Suggested Retail Price nga gi-isyu,” asoy ni Caberte.

Atol sa ilang inspeksiyon dunay mga pipila ka problemang nakita sama sa mga price tags nga wala ma-update.

Apil sa gisusi ni Caberte ang supply sa baboy sa duha ka supermarket.

“I was asking if they are expecting or duna naba sila’y na feel nga ni-menus ang supply considering that we are now relying on local brands ilang gisulti wala pay advise so I think we will make Christmas nga wala gyuy restriction sa supply, normal,” dugang sa director.

Si Donna Mendez, Assistant Store Manager sa Colonnade mipaneguro sa publiko nga duna sila’y igong supply sa pork products nga molanat hantod sa katapusang bahin ning tuiga.

Samtang matod sab ni Egan Pacquiao, Supermarket Mananger sa Super Metro Colon mokunhod pa gyud ang presyo sa ilang mga produkto tungod unya sa kompetisyon sa ubang mga supermarkets.

Gipahimangnoan ni Caberte ang mga tindahan nga kun masakpan sila nga nikalapas sa SRP ang DTI-7 paesplikahon pinaagi sa show cause order.

Ang Senior Trade and Development Specialist sa DTI-7 Dinah Gladys Oro miasoy sab nga kadtong mapamatud-an nga nakalapas sa SRP may multa nga P5,000 ngadto na sa P1 million. (/IBM)(BANATNEWS)