One Time Bigtime Operation batok sa nakalapas sa trapiko

CEBU, Philippines — Ang Philippine National Police-Highway Patrol Group uban sa laing law enforcement agency ang nagpahigayon og “Joint One Time Bigtime Operation”.

Kini subay sa kamandoan ni Presidente Rodrigo Roa Duterte sa pagpatuman sa mga balaod sa trapiko sa nasud.

Matud sa hepe sa Cebu Provincial Highway Patrol Field Unit Police Captain Michael Gingoyon nga nagpahigayon sila og massive checkpoint sa tibuok Probinsiya sa Sugbo batok sa mga carnapped, kolurum nga sakyanan, overloading nga mga van ug uban pa nga nakahimo og kalapasan sa balaod sa trapiko.

Ang mga ahensiya nga niapil sa kalihukan mao ang Land Transportation Office, Land Transportation Franchising and Regulatory Board (LTFRB) ug local police stations.

Sa laing bahin, si  Architect  Florentino  Nimor, hepe  sa Traffic Enforcement Agency of Mandaue (TEAM) niila  sa Higway Seno  sa  Barangay  Tipolo ug  eskina A.S.  Fortuna, M. C.  Briones, Ouano Avenue, A.S.  Fortuna St. ug ingon man dapit sa Pacific Mall sa Ibabao Estancia nga “red alert areas”.

Kini base sa gihimo nilang mga pagtuon diin diha sa maong mga lugar ang nasutang adunay labing daghan nga nahitabong aksidente gikan sa Oktubre 1 hangtud sa 31, 2019 diin nikabat ngadto sa 344 ka pribadong sakyanan ug 34 ka motorsiklo ang nalambigit sa aksidente.

Samtang sa Dakbayan sa Talisay, gilauman nga ang City of Talisay-Traffic Operation ang Development Authority (CT-TODA) mahimo na kining departamento sa sunod tuig.

Si Jonathan Tumulak, hepe sa CT-TODA nagkanayon nga hinayhinay na nila nga gi-develop ang buhatan sa CT-TODA ingon man ang training sa enforcers.

Gibutyag ni Tumulak nga naaprobahan na ang traffic code ug padayon usab ang ilang pagkuha og mga bag-ong enforcer. (/BDB)(BANATNEWS)