CEBU, Philippines — Gipanday karon sa konseho sa Dakbayan sa Talisay ang usa ka sketch ordinance aron pag-obligar sa mga motorista nga magbawon og chalk o bisan unsa nga butang nga makamarka sa karsada panahon nga makasugat og disgrasya.
Si Jonathan Tumulak, traffic czar sa siyudad, nagkanayon nga ang sketch ordinance ang gipanday ni Konsehal Ferdie Rabaya tumong nga mapakunhod ang trapiko kung dunay ginagmay nga panghitabo sa karsada.
Pinaagi sa maong ordinansa ang motorista nga malambigit sa panagbangga makahimo na og sketch pinaagi sa pagmarka sa chalk sa karsada ingon man pagkuha og hulagway sa ilang mga sakyanan.
Ilakip sab sa ordinansa nga kuhaon dayon ang mga sakyanan aron dili makaali sa karsada.
Ang makuha nga sketch ug hulagway ang isumiter ngadto sa kapolisan alang sa dugang imbestigasyon.
Nagkanayon si Tumulak nga ang mga drayber nga dili mohimo sa gilatid sa ordinansa ang mahimo nga makamulta.
“Dili ni siya prone sa lalis kay sila mang duha ang mokuha sa sketch. Magsabot-sabot ra sab sila,” sigun ni Tumulak.
Ang mga disgrasya nga makuha sa CCTV dili na kinahanglan ang sketch. GMR (BANAT NEWS)