CEBU, Philippines — Usa ka abogado gisikop sa Office for Transportation Security (OTS) sa Mactan-Cebu International Airport human siya giingong nakuhaan og marijuana.
Giila ang abogado nga si Atty. Caesar Tabotabo nga taga Brgy. Guadalupe Dakbayan sa Sugbo.
Matud ni Philippine Drug Enforcement Agency Intelligence Officer II Jojit Tubali ilang gipugngan nga makalahos sa sud sa tugpahahan si Tabotabo human nga nitingog ang alarm sa usa sa mga security checkpoint sa ganghaan sa maong tugpahanan.
Tungod niini ilahang gipugngan si Tabotabo ug gisusi ang iyang mga dala lakip na ang mga gamit sulod sa bulsa diin dunay kaha sa sigarilyo nga nakita ug gihangyo siya nga masusi kini sa mga otoridad.
Gibutang ni Tabotabo ang kaha sa sigarilyo sa lamesa ug didto nakit-an ang gidudahang marijuana.
Sa gihimong test sa nakuhang gidudahang marijuana sa Philippine Drug Enforcement Agency (PDEA) ug nakumirma nga marijuana ang nakuha gikan kang Tabotabo.
Apan depensa ni Tabotabo nga wala siya kahibalo nga adunay marijuana sa sigarilyong iyang gibitbit. Sumala pa niya ebidensya kadto sa kaso nga iyang gikuptan.
Si Tabotabo mao ang abogado nila Amparo ug Luis Balili, ang tagiya sa kotrobersyal nga Balili property nga napalit sa kagamhanan sa Probinsya sa Sugbo.
Paingon unta sa kaulohan si Tabotabo kay adunay tambongan nga meeting apan tungod sa nahitabo gidala kini sa Lapu-Lapu City Police Office.
Kasong kalapasan sa Republic Act 9165 kun Comprehensive Dangerous Drugs of 2002 Section 11 kun pagkupot sa illegal nga drugas. (/IBM)(BANATNEWS)