CEBU, Philippines – Posible nga duna’y miscommunication ang nahitabo tali sa kapolisan ug Commission on Human Rights-7 sa wala pagtambong sa imbestigasyon sa police escort ni Clarin Misamis Occidental Mayor David Navarro.
Matud ni Cebu City Police Office officer in charge ug supervisor sa Task Force Navarro Police Colonel Geovanie Maines nga wala siya masayod nga duna’y imbitasyon kanila niadtong Lunes gani wala siya nadawat nga dokumento.
Gipasalig usab ni Maines nga wala sila gitago ug ila na usab gipahibalo nga andam sila nga ipaubos og imbestigasyon ilabi na nga ang National Bureau of Investigation maoy gitahasan sila ni Presidente Rodrigo Duterte sa pagsulbad sa pag-ambush patay kang Navarro.
Dugang pa ni Maines nga wala na sa CCPO nadestino ang upat ka mga polis human nga giparelibohan ni Police Regional Office 7 Director Police Brigader General Valeriano De Leon aron sa paglikay sa pagduda.
Hinuon susihon ni Maines kung nakadawat ba gyud og summon ang upat ka polis gikan sa CHR7.
“Aalamin naming kung nakatanggap ba sila nag letter, at kung naka tanggap tatanungin naming bakit hindi sila sumipot, basta wala kaming tinatago at willing kami na magpa imbestiga,” dugang pa ni Maines. Sa pagkakaron anaa pa gihapon sa Regional Personnel Holding and Accounting Unite (RPHAU) sila Police Major Edward Sanchez, Police Corporal Eutemio Catalan, Police Master Sergeant Carlo Balatoso ug Patrolman Lucidro Javier.
Apan bisan pa sa wala pagtambong sa maong mga polis, magpadayon ang imbestigasyon sa CHR bahin sa kamatayon ni Navarro human nga dunay siyam ka pinirmahang pamahayag gikan sa pamilya sa mayor ug sa mga testigo. (/IBM)(BANAT NEWS)