‘Heroes Run’ ipahigayon

CEBU, Philippines — Magpahigayon og ika-walo nga hugna sa Heroes Run ang Philippine Military Academy Alumni Association Philippine Army Chapter karong Nobiyembre 22 hangtud 24 sa Camp Lapu-Lapu, Apas, Dakbayan sa Sugbo.

Matud ni Civil Relation Services (CRS) chief, Major Christian Uy, nga ang maong kalihukan tinuig nga panawagan alang sa "Takbo Para Sa Kapayapaan" nga maoy tema sa kalihukan.

Dugang pa ni Uy nga ang makabenepisyo sa kalihukan mao ang  mga pamilya sa mga sundawo nga namatay atol sa mga operasyon o Killed In Action (KIA).

Dungan kini nga kalihukan sa tanang Army Chapter sa nasud.

Gihimug-atan usab ni Uy nga ang maong Fun Run usa ka talagsaon nga lumba sa dagan tungod ky adunay mga obstacle course, squad run ug firing competition  alang sa 20 ka teams nga mosalmot.

Gilauman nga mokabat sa 1,000 ang mosalmot sa maong kalihukan. (/GMR)(BANATNEWS)