Karsada dapit sa fish port butangan og rumble strips

CEBU, Philippines – Ang kagamhanan sa Dakbayan sa Talisay ug Department of Public Works and Highways (DPWH) 2nd engineering district nagtambayayong sa pagsulbad sa problema kabahin sa mga aksidente nga nahitabo diha dapit Talisay City Fish Port sa Sitio Salvador, Barangay Tanke.

Giingong adunay himuong magpakurog sa sakyanan nga moagi diha sa lugar aron malikayan na ang mga disgrasya.

Si Mayor Gerald Anthony “Samsam” Gullas, Jr. nagkanayon nga ang short term nga solusyon sa problema mao ang pagbutang og “rumble strips” diha sa karsada o badlis sa karsada nga mopakurog sa sakyanan.

Nasayran nga kasagaran sa mga nadisgraysa nga drayber nitug-an nga nakatagpilaw sila hinungdan nga ang ilang gimaneho nga sakyanan moambak sa pikas lane ug mobangga pa sa nagdagan nga sakyanan paingon sa Siyudad sa Sugbo.

Si Gullas nakigtigom sa mga personnel sa DPWH 2nd engineering district lakip na nila ni Konsehal Ferdie Rabaya, chairman sa committee on traffic ug ni Jonathan Tumulak, hepe sa City of Talisay-Traffic Operations and Development Authority (CT-TODA).

Gikatahong nasabutan nga aron mahatagan dayon og sulosyon ang suliran pakurog sa sakyanan una ang buhaton nga humanon sa dili pa ang Nobiyembre 20 niining tuiga.

Samtang ang long term nila nga sulosyon mao ang pagbutang og railings sa center island aron ang madisgrasya dili na molahos diha sa pikas lane.

Matud ni Gullas nga medyo malangan ang maong proyekto tungod kay nagkinahanglan pa kini nga gahinan og budget.

Hinuon ang maong proyekto giingong iapil sa DPWH sa sunod tuig nila nga budget aron kini masugdan dayon.

Si Gullas niawhag sa mga drayber nga unta defensive driving ang ilang himuon panahon nga magmaneho sa ilang sakyanan aron malikayan ang disgrasya. (/BDB)(BANAT NEWS)