Cebu City mopalambo sa emergency response

CEBU, Philippines — Ang kagamhanan sa Dakbayan sa Sugbo nakigtambayayong sa Sugbotek aron mapalambo ang mga pamaagi sa pagresponde panahon sa mga emerhensiya kong dunay moigo nga katalagman ug mahitabo nga  aksidente pinaagi sa usa ka mobile-application nga magsilbing emergency dispatch ug civilian reporting system.

Gi-ugmad sa Sugbotek ang “Guardian”  diin usa kini ka app nga makatabang sa pagtubag sa katawhan nga nanginahanglan og dinaliang atensiyon atol sa mga katalagman sama sa sunog, medikal ug krimen.

Ubos sa Memorandum of Agreement (MOA) tali sa Sugbotek ug Dakbayan sa Sugbo, ang siyudad mogamit sa application nga Guardian aron mapadali ang pagresponde ug pagtabang sa mga nanginahanglan.

Ang kabarangayan sa siyudad giawhag nga magtinabangay kabahin sa maong programa ug iparehistro ang ilang mga kabtangan sama sa trak, ambulansiya, mga mobile patrol nga mga sakyanan nga mamahimong magamit sa Guardian.

Ang mga residente nga adunay kahanas ug kasinatian sa pagtubag sa mga emerhensiya giawhag usab nga magpalista aron sila makatabang sa mga emerhensiya panahon kong adunay moigo nga katalagman.

Ang duha ka habig nagkinahanglan usab kini nga mo-coordinate sa mga local government unit ug national nga ahensiya aron makonektar ang Guardian.

Gitinguha sa Sugbotek nga ang Guardian application libre ang serbisyo niini ngadto sa publiko lakip na ang serbisyo sa mga operator nga motubag atol sa mga emerhensiya.

Ang Sugbotek nilusad og technical training alang sa operasyon sa Guardian ug pagmentinar niini.

Ang Sugbotek mohatag usab og training sa IT Department sa Dakbayan sa Sugbo lakip na sa mga responder sa siyudad. (BDB)(BANATNEWS)