‘Todos los Santos’ malinawon

CEBU, Philippines — Malinawon ang pagtimaan sa Adlaw sa mga Santos sa Sugbo sugod kagahapon sa buntag.

Matud sa hepe sa Inspection Audit sa Cebu City Police Office-Internal Affairs Service, Police Major Mark Nadanza, nga wala silay problema nga nasugatan atol sa ilang pagbisita sa mga terminal ug mga sam-ang.

Ilang tinguha nga malinawon hangtud sa pagtapos sa kalihukan diin ilang gipakatap ang mga polis sa mga lugar nga daghang tawo nga magtapok.

Gimando sab ni Cebu City Mayor Edgardo Labella sa kapolisan nga sitahon ang mga tawo nga maghugaw-hugaw sa palibot sa mga sementeryo.

Gawas sa usa ka malinawon, hapsay, ug solemne nga kalag-kalag, buot ni Labella nga limpyo sab ang palibot sa mga sam-ang.

“Naa koy nakit-an naglabay na og papel, basura. Kinahanglan gyud natong disiplinahon ni. We have to discipline the people because garbage problem has metamorphosed into a social problem. We have to educate our people,” matud ni Labella.

Nagpahigayon og ocular inspection si Labella kagahapon sa mga sam-ang sa siyudad aron maseguro ang kalinaw ug kahusay alang sa kalag-kalag.

Gihatagan usab niya og importansya ang police visibility sa tanang sam-ang.

Matud niya nga kini magsilbing usa ka pagpugong sa bisan kinsa nga gusto nga mohimo og kalapasan sa sulod sa mga sam-ang.

Gidili sa sulod sa mga sam-ang ang mga ilimnong makahubog, hait nga mga butang, pusil, ug mga gamit sa sugal. Gibutang sab sa matag sam-ang ang usa ka ambulansya ug first aid ug disaster risk reduction groups.

Gihangyo ni Labella ang kooperasyon sa publiko aron makab-ot sa siyudad ang malinawon ug hapsay nga kalihukan.

Sa Dakbayan sa Mandaue higpit nga gibantayan sa kapolisan ang sementeryo nga gidumala sa kaparian nga mao ang St. Joseph’s Parish Roman Catholic Cemetery sa Barangay Guizo diin kasikbit niini ang tulo ka pribado nga sementeryo.

Si Police Master Sergeant Ronald Allan Kintanar sa Presinto 1 sa Mandaue City Police Office nga maoy ground supervisor sa maong lugar niingon nga sugod sa sayo sa buntag kagahapon ilang gipatuman ang managlahing agianan alang sa pagsulod ug ingon man lain usab ang agianan alang sa paggawas aron kalikayan ang panaghuot ug higpit nilang gidili ang mga tindahan.

Sa gawas sa sementeryo adunay Police Assistance Desk nga maoy kadangpan sa mga tawo nga makasugat og mga kakulian ug gilainlain usab nila ang agianan sa pagsulod sa mga babaye ug mga lalaki alang sa inspeksiyon.

Samtang si Lapu-Lapu City Police Office Director Colonel Clarito Baja ang nipahugot usab sa pagbantay sa mga sementeryo pinaagi sa pagdestino og 200 ka polis sukad kagahapon.

Ang kapolisan giabagan sa gatusan ka force multipliers sama sa mga barangay tanod ug ubang volu nteers aron pagpabiling hapsay ang mga sementeryo. (GMR)(BANATNEWS)