Parade of Saints, dili ungo-ungo

CEBU, Philippines — Inay sa ungo-ungo o gamit ang mga makahadlok nga sapot panahon sa kalag-kalag, mga simbahan sa Archdiocese of Cebu ang nagpahigayon og Parade of Saints sa kabataan sul-ob ang mga senina sa mga santos.

Sa St. Peter and Paul Parish sa Bantayan Island adunay gihimo nga March of Saints sa mga bata nga edad 12-anyos paubos.

Gatos kapin ka bata ang niapil diin nagagikan kini sa lain-laing barangay nga sakop sa parokya ug mga pundok ingon man ang Children Apostolate of Fatima.

Matud ni Marie Therese Aller, presidente sa Word Apostolate of Fatima Bantayan Chapter, nga ang nagpasiugda sa maong kalihukan usa ka Christ-centered alternative sa Halloween sukwahi sa gihimo sa secular world o mga malls.

Ang Apostolate of Fatima Formators gikan sa Dakbayan sa Sugbo ang nipaambit sa kabataan may kalabutan sa kinabuhi sa mga Santos diin gisundan kini sa Santos nga Misa, parada ug gamay nga salo-salo sa kabataan.

Susama usab niini ang gihimo sa Holy Rosary Parish sa Tuyan, Dakbayan sa Naga diin aduna silay 99 ka kabataan ang niapil usab sa Children of Mary Saint Look Alike nga gitak-opan usab nila ang kalihukan pinaagi sa Living Rosary subay sa pagtapos sa Month of the Holy Rosary.

Si Fr. Jestoni Del Castillo sa Academia de San Martin sa Daanbantayan nitug-an nga tuyo sa simbahan nga ang mga tawo unta mopasidungog ug motamod sa mga Santos.

Matud ni Del Castillo nga ang Nobiyembre 1 adlaw sa mga Santos nga nailhan ug wala.

“Apan maka-distort ug makasimang ning tuyo sa uban kay mga ungo-ungo man hinoon ang napahimug-atan. Nisimang sa saktong tuyo sa simbahan! Matud pa sa kaila nako nga mo-deliverance sa gahum sa dautan, kaning pagsul-ob sa mga ungo-ungo nga costume mamahimong opening sa dautan sa paghilabot o pag-harass o pagsulod sa nagsul-ob niana kay daw niuyon man siya sa paghisusama sa iyang giawat. Mao nay nakadelikado ana,” matud niya. (GMR)(BANATNEWS)