Roro nasangad sa Camotes
CEBU, Philippines — Roro nga nagbiyahian sa Danao padung Camotes island nasangad 200 metros gikan sa pantalan sa Consuelo Wharf sa San Francisco sa maong isla kagahapon.
Hinuon luwas nga nakanaog sa pantalan ang 311 ka mga pasahero sa MV Mika Mari 3 sa Jomalia Shipping lakip ang 23 ka mga rolling cargos niini.
Ang tigpamaba sa Coastguard Lieutenant Junior Grade Michael John Encina miingon nga base sa report sa CG Sub-Station San Francisco gitawgan sila sa MV Mika Mari 3 nga napagngan sila sa ilang auxiliary engine sa dihang duol na sila sa pantalan mao nga nawagtangan kini og sa ilang timon hangtud nga gianod sila sa mabaw nga bahin ug nasangad 200 metros gikan sa pantalan.
Ang MV Mika Mari 3 nibiya sa pantalan sa Danao City alas 5:30 sa kaadlawon. Ang mga pasahero gipabalhin ngadto sa sakayan nga maoy nagdala kanila sa pantalan. Gimanduan ang kapitan pagduso og marine protest bahin sa nahitabo. Sa pikas bahin, upat ka mga mananagat nga nagpautaw-utaw nalang sa kadagatan sa Cebu Strait ang giluwas sa mga sakop sa PCG MRRV 4406 BRP Suluan.
Matud pa gikan sa Talisay City padung unta sa Bohol sila si Eric Campo, 45; Hoven Gasalatan, 33; Jonas Padillo, 28; ug Jaypee Gasalatan, 21, sa dihang nakasugat sila og unos ug nasudla’g tubig ilang pumpboat.
Naagian sila sa PCG diha sa 9.2 NM East sa Carcar Point. (/IBM)(BANATNEWS)
- Latest
