Cebu, Philippines — Natingkagol sa Talisay City detention cell ang usa ka retiradong sakop sa Philippine Constabulary (PC) human kini giingong nanion og armas ngadto sa sakop sa City of Talisay-Traffic Operation Development Authority (CT-TODA) niadtong Biyernes sa buntag diha sa Barangay San Roque, Dakbayan sa Talisay.
Ang biktima mao si Eduarlito Fernandez, 58, sakop sa CT-TODA daling nangayo og tabang sa kapolisan human sa maong hitabo.
Ang suspetsado mao si Rosalio Ybas, 79-anyos, minyo, taga Sitio Kimba, Barangay San Roque sa nahisgutang siyudad.
Base sa imbestigasyon sa kapolisan niadtong higayona naghimo sa iyang inadlaw nga duty ang biktima dihang nakakita og batan-on nga nagmaneho og motorsiklo nga walay helmet nga gisul-ob.
Padulong na unta nga moisyu og citation ticket ang biktima ngadto sa batan-ong drayber apan kalit nga naabot ang suspek kinsa giingong apohan sa maong batan-on. Ang suspek nihangyo kini nga pasayluon lang una ang batan-on apan nibalibad ang biktima ug tungod niini giingong gilabnot sa suspek ang motorsiklo ug dayon sukmag ngadto sa biktima.
Ug dihang nisuway og depensa ang biktima sa iyang kaugalingon giingong nibunot sa iyang kalibre .38 nga revolver ang suspek dayon tion ngadto sa biktima.
Ang biktima dali nga nangayo og tabang sa kapolisan hinungdan nga nasikop ang suspek.
Nasuta nga walay lisensiya ang armas sa suspek diin aduna kini 17 ka buhing bala ug duha ka speed loaders. BDB ( BANAT NEWS)