Cebu, Philippines —Nikabat ngadto sa P400 milyones ang target nga makolektang buhis sa Talisay City Treasurers Office.
Ang maong makolekta gamiton kini sa mga proyekto sa gobiyerno.
Sa pagkakaron, gumikin sa ilang subsob nga pagpangolekta nikabat na ngadto sa P268 milyones ang nakolektang buhis sa TCTO.
Si Emma Macuto, city treasurer sa siyudad nagkanayon nga nagtuo siya nga tungod sa ilang gipatuman ang examination sa books of accounts sa mga patigayon niabot sa maong kantidad ang ilang nakolekta.
Matud ni Macuto nga 60 porsyento sa mao nilang nakolektang buhis gikan sa mga patigayon.
Gipanglantawan ni Macuto nga sa kataposang kwarter niining tuiga makakolekta pa sila og kapin sa P100 milyones.
Gibutyag ni Macuto nga kasagaran sa kataposang kwarter sa tuig modagsa ang mga mobayad sa ilang buhis. Si Macuto nipasalamat sa mga negosyante nga nituman gyud sa ilang obligasyon diin ang kagamhanan sa siyudad makalihok usab sa ilang mga programa alang sa mga Talisaynon tungod kay aduna kini pundo nga magamit.
Ang makolektang buhis karong tuiga magamit kini alang sa sunod tuig nga budget. BDB ( BANAT NEWS)