86-Anyos giungo patay

CEBU, Philippines —Usa ka 86-anyos nga lola nga gituohang giungo ang nakit-an nga wala nay kinabuhi sa Barangay Candamiang, bukirang bahin sa Lungsod sa Santander niadtong Martes sa hapon.

Ang biktima nailhan nga si Maria Abrahama Miras, biyuda ug residente sa maong lugar.

Ang mga residente sa lugar nibutyag nga giingong giungo ang biktima apan si Police Master Sergeant Anthony Aba, desk officer sa Santander Police Station nibutyag nga estorya-estoya lang sa mga tawo ang giingong giungo ang ginang.

Ang kapolisan nihimo pa og imbestigasyon may kalabutan sa kamatayon ni Miras.

Sumala pa ni Aba nga ang ilang buhatan nakadawat og tawag gikan sa treasurer sa barangay may kalabutan sa kahimtang ni Miras nga nakit-an sa iyang apo samtang naghatud unta kini og pagkaon para sa tiguwang.

Nakit-an ang biktima nga nabuwasot ang tiil niini sa balay nga gipuy-an samtang ang kamot niini sa tuo naputol ug ang wala nga kamot bukog nalang ang nahabilin nga gituohang gikaon og mananap.

Gitug-an ni Aba nga base sa initial findings sa doktor sa tambalanan, pagkahurot sa dugo ang hinungdan sa kamatayon ni Miras.

Si Aba nitug-an nga ang pamilya ni Miras walay plano nga ipaubos sa autopsy ang patayng lawas sa tiguwang.

Ang kapolisan dili makatumbok nga giungo ang tiguwang kay estorya ra kini sa mga tawo. GMR (BANAT NEWS)