Duha ka ginagmay nga sunog sa Mandaue

CEBU, Philippines —Duha ka alarma sa sunog ang gitubag sa kabomberohan sa Dakbayan sa Mandaue niadtong Martes sa buntag. Unang sunog nahitabo sa may Sitio Cagapi, Paknaan diin usa ka payag-payag ug duha ka sakyanan ang apektado.

Nadawat sa kabomberohan ang alarma alas 8:39 sa buntag diin giisa lang sa first alarm nga nidanyos og P12 mil.

Ang payag-payag gipanag-iya ni Rey Garcia samtang ang duha ka sakyanan iya ni Miguel Brigoli ug Dodo Pareja.

Ikaduhang sunog niulbo sa may Barangay Jagobiao diin usa ka abandonado nga panimalay ang nasunog.

Alas 9:08 sa buntag nadawat sa kabomberohan ang alarma sa sunog sa panimalay nga gipanag-iya ni Demetrio Cortes Sr.

Ang maong sunog giisa lang sa first alarm diin gibana-bana nga dul-an sa P38 mil ang danyos sa maong sunog.

Matud ni Senior Fire Officer 1 Jade Roble nga ipaubos pa sa imbestigasyon ang maong sunog kung unsay hinungdan ilabi na nga abandonado na kini ug walay nagpuyo. (BANATNEWS)