P10.4B giduso nga budget sa siyudad

CEBU, Philippines — Naduso na ni Cebu City Mayor Edgardo Labella ang proposed annual budget sa 2020 nga balor og P10.4 bilyones sa konseho sa siyudad. Kini ang gikompirmar ni Konsehal Raymond Alvin Garcia, chairman sa committee on budget and appropriations sa konseho.

Base sa sugyot ni Labella, 46 porsyento niini alang sa general public service nga nagkantidad og P4.8 bilyones samtang ang social services gigahinan og P2.9 bilyones.

Matud ni Labella nga ang tinubdan sa pundo mao ang halin sa luna sa South Road Properties, local revenues ug Internal Revenue Allotment.

Giklaro ni Garcia nga unahon nila pag-aprobar ang Annual Investment Program 2020 nga kantidad og P15 bilyones nga maoy giduso sa Cebu City Development Council. Tukion sa konseho ang AIP karong Martes dayun isunod ang budget hearing sa matag departamento. (BANAT NEWS)