CEBU, Philippines — Masaligon si Gob. Gwendolyn Garcia nga ma-convert ang status sa Isla sa Bantayan gikan sa pagka “wilderness” ngadto na sa pagka “alienable and disposable land”. Si kanhi kongresista Benhur Salimbangon maoy una nga nisang-at sa balaudnon sa Kongreso apan naabtan kini sa pagkapupos sa iyang termino.
Malaumon si Garcia nga ang kapikas niini nga si Kong. Janice Salimbangon ang mopadayun niini sa Kongreso.
“Congress gyud niana. Si Benhur filed nga ma-converted to alienable and disposable, karon I’m sure Cong. Janice will take it up and refile the bill,” matud sa gobernador. Nakita sa gobernador nga importante nga matitulohan na ang maong luna sa isla alang sa development sanglit limitado ang maugmad niini kay tax declaration lang ang mga luna sa isla. Hinoon dili kini babag sa pagpalambo sa Bantayan Airport nga daku ang matabang sa isla alang sa turismo ug sa emerhensiya.
“But this will not also impede our development, our plans nga maghulat usa ta nga ma-alienable and disposable una pa sugdan ang atong mga development o infrastructure diha,” matud ni Garcia.
Ubos sa Presidential Decree No. 2151 nga gi-isyu ni kanhi Presidente Ferdinand Marcos niadtong 1981, apil ang Bantayan sa sa mga areas nga gideklarar nga “wilderness” diin nagpasabot nga ang tibuok isla dili mapanag-iya og pribado ug dili usab matitulohan. (/GMR)(BANATNEWS)