CEBU, Philippines — Ang kabomberohan sa Dakbayan sa Talisay nipaubos sa full alert niining nagsingabot nga kapistahan ni Sta. Teresa de Avila nga patrona sa siyudad.
Kini maoy gibutyag ni Senior Inspector Arra Alpajaro, fire marshal sa siyudad.
Matud ni Alpajaro nga niadto pang Oktubre 4, 2019 sila nga nagsugod sa ilang alert status diin hangtud kini sa adlaw sa kapistahan karong Oktubre 15, 2019.
Gibutyag ni Alpajaro nga walay gitugotan sa iyang mga sakop nga maka-leave aron makatabang kini kon adunay mga alarma nga motumaw.
Sayo pa, ang mga sakop usab sa City of Talisay-Traffic Operation Development Authority (CT-TODA) ang gidid-an na usab sa pag-leave o absent subay sa nagsingabot nga kapistahan.
Matud usab ni Alpajaro nga ang ilang upat ka fire truck ang ipangkatag diha sa nagkadaiyang lugar sa siyudad nga gilangkuban sa city hall grounds, Poblacion ug sa simbahan ni Sta. Teresa de Avila.
Gipahinumduman ni Alpajaro ang katawhan nga kong managkot, ang kandila diha lang ipahimutang sa gawas nga bahin sa simbahan aron malikayan ang disgrasya.
Si Alpajaro nagkanayon nga labing maayo nga adunay balde nga adunay tubig diha sa kilid sa dagkotanan aron dali mapawong kong modako ang kayo.
Ug giawhag usab ni Alpajaro ang katawhan nga dili magpanuko sa pagtawag kanila kon adunay insidente nga mahitabo diha sa ilang lugar. (/BDB)(BANATNEWS)