Bantayan Airport himoong commercial

CEBU, Philippines — Plano sa Mactan-Cebu International Airport Authority (MCIAA) nga mahimo nga commercial airport ang Bantayan Airport sa Lungsod sa Sta Fe.

Ang maong tugpahanan sa pagkakaron usa pa ka community airport diin ang mga propeller pa nga eroplano ang makagamit niini.

Matud ni Atty. Steve Dicdican, general manager sa MCIAA, nga plano nila nga magamit kini sa commercial flights.

Ang pagpalambo sa tugpahanan gisugdan pinaagi sa pag-ayo sa terminal facility, communication building ug ubang pasilidad diin P3.8 milyones ang gasto niini ug isunod ang paghimo sa 1.2 kilometro nga runway gikan sa kasamtangang 900 metros.

Moabot sa P94 milyones ang pundo alang sa pagsemento sa runway apil na ang koral.

Kagahapon nagpinirmahanay ang mga opisyal sa Kapitolyo pinangulohan ni Gobernador Gwendolyn Garcia ug MCIAA pinaagi ni Dicdican alang sa pagpalambo sa maong airport.

Ubos sa maong MOA, ang MCIAA ang mo-operate ug modumala sa tugpahanan lakip ang pag-atiman sa pasilidad, pagtukod og perimeter fence ug pagpalambo sa runway.

Si Garcia nagpasalamat sa MCIAA sa gihimo sa Bantayan Airport nga nahimutang sa 29 ektaryang luna nga gipanag-iya sa Probinsiya sa Sugbo.

“Hopefully maka-attract ni og additional flights,” matud ni Garcia.

Ang pagpalambo sa Bantayan Airport nakita sa gobernador nga pamaagi aron nga mas molambo pa ang turismo sa isla ilabi na nga pinaagi sa maong tugpahanan mas dali na ang pagbiyahe sa mga turista nga gusto mobisita sa isla. (GMR) (BANATNEWS)