Scholarship program gilusad sa Talisay

CEBU, Philippines – Ang Dakbayan sa Talisay nigahin og P5 milyones nga budget alang sa scholarship program nga gilusad ubos sa programa ni Mayor Gerald Anthony “Samsam” Gullas, Jr.  Gitanyag ni Gullas ang “cream of the crop” kinsa ang mga utokan nga kabataan gikan sa pampublikong tunghaan nga adunay lahi nga abilidad ang makapadayon sa pagtungha sa kolehiyo nga libre.

Gipasabot ni Gullas nga ang nigradwar sa grade 12 nga maayo sa math subject mahimo nga mokuha og kurso nga engineering.

Nakita ni Gullas nga ang usa ka tinun-an pwede nga mahimong engineer sa umaabot pinaagi usab sa tabang sa siyudad nga makatungha kini sa inilang tunghaan sa Siyudad sa Sugbo.

Ang mga tinun-an nga dili mahimo makasulod sa programa mahimong makapadayon sa pagtungha sa Talisay City College (TCC) nga nagtanyag usab nga libre.

Sa tuig 2018-2019 niabot sa 1,000 ang mga tinun-an nga nigradwar sa grade 12 apan 369 kanila ang wala makatungha sa kolehiyo ug ang 13 sa maong mga tinun-an mga honor.

Si Dr. Arden Monisit, schools division superintendent maoy gitahasan sa pagbuhat sa guidelines aron makakuha sa scholarship program.

Lakip sa mga rekisitos sa mo-apply sa maong scholarship kinahanglang 85 ngadto sa 90 percent ang grado; certification gikan sa barangay sa Siyudad sa Talisay; certification sa pampublikong tunghaan nga gitunghaan; photocopy sa voter’s ID o certificate sa Comelec sa ginikanan o guardian.

Giklaro ni Gullas nga wala niya gilakip ang University of Visayas (UV) paglikay sa mga isyu nga motumaw. Ang school division office nagsugod na sa pagdawat og aplikante hangtud kini sa buwan sa Enero sunod tuig. (/BDB)(BANAT NEWS)