Night classes sa Talisay giplanohang wagtangon

CEBU, Philippines – Nagplano ang Department of Education (DepEd) sa Talisay City Division nga wagtangon na nila ang night classes.

Kini aron kahatagan og solusyon ang problema nga ilang nakita labot sa pagkalambigit sa mga tinun-an sa ilegal nga drugas.

Si Dr. Arden Monisit, schools division superintendent niangkon nga wala nila gipakagamay ang isyu nga nanggawas labot sa mga tinun-an nga giingong niapil na usab sa ilegal nga kalihukan.

Usa sa ilang nakita mao ang kahumok sa mga tinun-an nga magalgal o matental sa mga bisyo panahon sa kagabhion.

Ang siyudad adunay tulo ka dagkong tunghaan nga adunay night high schools nga mao ang Talisay Central School, Tabunok ug San Isidro.

Ang maong mga tunghaan adunay 1,100 tinun-an.

Matud ni Monisit nga kong iimplementar nila ang maong plano makuwangan ang mga classroom ug magtutudlo tungod kay modaghan ang tinun-an nga isal-ot sa morning shift.

Hinuon si Monisit naglaom nga mahatagan nila og pamaagi ang maong problema.

Subay niini, si Kapitan Benjie Cabigas sa Barangay Tabunok nipadayag sa ilang nadawat nga impormasyon nga adunay tinun-an nga nalambigit sa ilegal nga drugas bisan sa kabata pa sa ilang pangedaron.

Gipalig-on na usab nila ni Monisit ang ilang Supreme Student Government (SSG) aron maoy motabang sa mga batan-on nga dili matumpawak sa mga bisyo. (/BDB)(BANAT NEWS)