MANILA, Philippines – Nanawagan si Cebu City Councilor Prisca Niña Mabatid sa mga sakop sa media nga unta dili ibalita ang mga insidente sa hikog aron dili kini sundon sa uban.
Sa iyang privilege speech atol sa regular session sa konseho sa siyudad niadtong Martes, si Mabatid nagkanayon nga iyang giila ang katungod sa media ug ilabi na ang “freedom of the press” apan iyang hangyo nga unta dili lang ibalita ang maong mga kaso aron dili na kini sundon sa uban.
Si Mabatid nilakbit sa pagtuon nga gihimo sa World Health Organization niadtong tuig 2015 diin 8,761 ka estudyante ang nisuway paghikog.
Apan nabalaka si Cebu City Councilor Anthony Cuenco nga usa ka abogado nga ang maong lakang makasupak sa “freedom of expression” nga nalatid sa Batakang Balaod.
Matud ni Mabatid nga iyaha lang gipahamug-atan ang Social Learning Theory nga nagkanayon nga mamahimong kopyahon ug sundon sa usa ka tawo ang gibuhat sa uban.
Hinuon nisugyot si Cuenco nga hangyuon na lang ang media sa dili pagmantala sa pangalan sa naghikog sama sa dili nila pagbutyag sa ngalan sa mga biktima sa pagpangbuso o pagpanglugos.
Samtang si Councilor Raymond Alvin Garcia nisugyot nga unta iapil sa media sa ilang kalihukan ang pagtuki sa epekto sa pagtaho sa kaso sa paghikog sa behavioral health o mental health sa mga bata ug batan-on. (/BDB)(BANAT NEWS)