CEBU, Philippines — Usa ka fraternity nga nagbase sa Dakbayan sa Talisay ang nisaad ngadto sa kapolisan nga kahapsay ug kalinaw maoy ilang tumong ug tuyo.
Si Police Major Orlando Carag, Jr., hepe sa Talisay City Police Station nibutyag nga giuna niya og pakig-estorya ang lider sa Tau Gamma Phi.
Gihimo kini ni Carag human sa nahitabong pagpamusil diha sa Barangay Linao diin usa ka sakop sa Alpha Kappa Rho (AKRHO) fraternity ang gipusil sa giingong miyembro sa Tau Gamma Phi.
Nisibat ang duha ka kriminal ug pag-abot nila diha sa Lungsod sa Minglanilla namusil kini sa patrol car nga nagpundo sa lugar.
Sa maong pagpamusil naigo patay si Police Senior Sergeant Alfredo Pagaling, 52, taga Barangay Vito sa maong lungsod.
Si Pagaling mao ang team leader sa team bravo sa Mobile Patrol Section sa Minglanilla Police Station.
Si Carag nagkanayon nga parehong nihimakak ang lider sa usa ka fraternity nga aduna sila’y bangi sa kaatbang niini nga grupo.
Hinuon ang mga sakop sa fraternity ang nisanong nga makig-alayon sa kapolisan aron malinawon ang ilang pagdumala sa ilang organisasyon.
Gibutyag ni Carag nga silang mga hepe sa kapolisan sa unang distrito nagplano sa pagpahigayon og covenant signing sa duha ka magkaribal nga fraternity.
Dugang ni Carag nga gikatakdang estoryahon usab niya ang lider sa AKRHO nga nagbase sa siyudad. (BDB) (BANAT NEWS)