Upat ka balay naugdaw

CEBU, Philippines — Upat ka balay ang gilamoy sa nahitabong sa sunog sa 2nd Street, Barangay Duljo-Fatima, Siyudad sa Sugbo kagahapon sa buntag.

Matod ni Fire Senior Inspector Arnel Abella, Chief sa Operations Section sa Cebu City Fire Station alas 10:49 kagahapon sa buntag nila nadawat ang tawag ug giisa dayon kini ngadto sa third alarm.

Alas 11:34 sa butang gideklarar sa kabomberohan ang sunog nga under control ug hingpit kining na-fire out alas 11:52.

Miabot sa dul-an P200,000 ang danyos sa maong sunog ug dunay usa nga naangol human napaso sa hitabo nga mao ang tag-iya sa balay kun asa nagsugod ang sunog.

“Kung napansin ninyo kusog ang hangin so paspas gyud ang pag-transfer sa kalayo sa layo nga balay so far makitid pud ang area sa surrounding so maglisod ang firetruck pagsulod kung napansin ninyo atong mga firetrucks tua ra sa gawas nagladlad lang ta og line pasulod but diri sa left side nato is naay mga nakasulod nga firetruck while diri sa right side nasa gawas ra sila sa highway,” sigon ni Abella.

Gihulagway hinoon ni Abella nga dako og tabang ang firewall sa pipila ka mga balay tungod wala dayon makakatap ang sunog sa laing mga kabalayan.

Subay niini, si Elino Figuracion, tag-iya sa balay nga gihimong boarding house kun asa nagsugod ang sunog ug naangol miingon padung na unta siya maligo dihang nakadungog kini nga mitingog ang fire alarm diha sa hallway.

Misaka siya sa taas ug gikan sa usa sa mga kwarto nagsugod ang kalayo. Gisuwayan niya kini pagpawong gamit ang fire extinguisher apan wala niya kini mapakgang pagdako.

“Nagpahipi ko sa bungbong, pag-after nahurot ra sad ang kuan (fire extinguisher) wala’y nisunod nako. Wire gyud siguro, wa may ingon nga nagluto sa taas, luto sa ubos raman tanan,” ni Figuracion pa. (/IBM)(BANATNEWS)