CEBU, Philippines – Kasamtangang gipundok sa Barangay Zapatera Gym sa Dakbayan sa Sugbo ang 180 ka Chinese nga nasikop sa online gambling sa Dakbayan sa Lapu-Lapu.
Matud ni Barangay Kapitan Francisco “Frank” Benedicto nga ang ilang gym ipagamit kini nila nga libre.
Sumala pa ni Benedicto nga gikalipay nila ang makatabang sa daghan nga mga langyaw nga makapahuway kay pabilin pa man kini silang mga bisita ilabi na wala pa sila hukmi sa sala nga ilang nahimo.
Daku ang pagtuo ni Benedicto nga napili ang iyang barangay kay pipila ra man ka gutlo ang gilay-on niini gikan sa Cebu City Police Office diin nahimutang ang buhatan sa Criminal Investigation and Detection Group 7.
Giklaro ni Benedicto nga libre ang pagpagamit nila sa gym isip temporaryong pinuy-anan sa mga langyaw samtang gihimo pa sa mga hingtungdang ahensya ang pagsang-at og tukma nga kaso gumikan sa mga kalapasan nga nahimo nila. (/GMR)(BANAT NEWS)