CEBU, Philippines – Pipila ka residente sa 2nd Street Sunrise Village, Barangay Poblacion Pardo, Dakbayan sa Sugbo ang nitiyabaw sa ilang kahimtang tungod sa nagpundong tubig nga grabeng kabaho ug kahugaw nga nakahatag na nila og kabalaka.
Matud pa ni Leonardo Viñas nga sobra sa napulo ka tuig na nga nagpuyo sa maong lugar ug sulod niining tuiga nasinati nila ang problema sa nagpundong tubig.
Giingong baho kaayo ug maglisud sila sa pag-agi sa lugar kung diin kinahanglan pa sila mogamit og butas ug mosakay sa bote nga nakapabalaka nila kay basin malimbuwad ang mga sakay ilabi na mga bata.
Dugang pa ni Viñas nga karon pipila ka buwan ug semana wala na gyud kini hubas-hubas ug kung adunay ulan moabot sa taga tuhod ang tubig kay wala namay kaagian nga drainage.
Sumala pa ni Viñas nga nabalaka sila karon sa ilang panglawas kay wala man silay klarong tulog tungod sa kabaho ug basin motumaw unya ang mga sakit sama sa dengue, leptospirosis ug uban pa.
Gitug-an ni Viñas nga dunay uban nga nanimuyo sa lugar ang nibiya na sa ilang gipuy-an tungod sa kabaho ug kalisud sa agianan.
Si Viñas nangiliyupo karon sa administrasyon ni Cebu City Mayor Edgardo Labella nga tabangan sila sa ilang problema ug sa City Health Department sa pagsusi usab sa ilang kahimtang aron kalikayan ang mga sakit nga posibleng motumaw.
Samtang si Kapitan Manolita "Litang" Abarquez sa Barangay Poblacion Pardo niklaro nga nihimo na sila og mga pamaagi kutob sa ilang mahimo ug gani nikuot silang mga opisyal sa ilang kaugalingon nga bulsa aron mahatagan og temporaryo nga sulbad ang maong problema.
Dugang pa sa kapitan nga ila na kini gipaabot sa nasudnon nga pangagamhanan apan wala gihapon kini mahimo kay dili man national road.
Ang kapitan nitug-an nga kung ang mga residente sa lugar motabang lang sa barangay pinaagi sa pagbalik sa karaan nga creek daku og kahigayunan nga mahatagan og sulbad ang maong problema human adunay dili mosugot ilabi na nga gipanag-iya kini og mga pribado nga tawo.
Si Abarquez nitug-an nga atol sa ilang gipahigayon nga pagpanglimpyo sa lugar nakahipos sila og mga sinako nga basura nga giali sa drainage sa maong lugar.
Giawhag ni Abarquez ang mga residente nga tabangan silang mga opisyal sa barangay sa paghatag og sulbad kay kini anaa ra sa mga tawo ang tubag sa maong problema.
Tungod kay bag-o man ang nagdumala sa pangagamhanan suwayan usab nilang magpakitabang kang Labella aron mahatagan og sulbad kay dili na makaya sa ilang level. (GMR)(BANAT NEWS)