Kasapaan, daplin sa dalan gilimpyohan

CEBU, Philippines – Dili mominus sa 700 ka pamilya nga informal settlers daplin sa sapa sa Dakbayan sa Sugbo ang ipang-relocate aron ipatuman sa Department of Public Works and Highways ang mga proyekto nga makasulbad sa problema sa baha.

Atol sa unang tigum sa Inter-Agency Task Force on Flooding kagahapon, gitug-an ni Engr. Earl Carlo Escanuela, assistant cluster head sa Unified Project Management Office-Cluster Control Management sa DPWH Central Office, nga nahunong ang ilang pagpalapad sa mga sapa tungod sa mga namuyo niini.

Kini anaa sa Barangay Guadalupe, Ermita, Pasil, Lahug, Tejero, Tinago ug uban pa.

Ang IATFF niila sab sa laing lugar nga bahaanan sama sa N. Bacalso Avenue, Pari-an area, Colon Street, mga barangay sa Tinago ug Tejero, ug uban pa. Matud ni Atty. June Maratas, pangulo sa IATFF, nga ang Division for the Welfare of the Urban Poor magpahigayon og socio-economic survey sa mga apektadong residente. Ang DPWH adunay gahin nga P140 milyones alang sa pagbalhin sa mga apektadong pamilya.

Sa Dakbayan sa Lapu-Lapu, giawhag ni Mayor Junard “Ahong” Chan ang mga molupyo ug mga magpapatigayon sa dakbayan sa paghawan sa mga daplin sa dalan ug paglimpyo sa palibot subay sa ordinansa sa siyudad.

Multa nga P300 sa una, P500 sa ikaduha ug ikatulo P1,000 o kaha pagkapriso sulod sa 30 ka adlaw ang ipahamtang sa malapason.

Mga pahibawo ang gipangapod-apod na  ngadto sa kabarangayan aron masayud gyud ang tanan.

Sa Dakbayan sa Talisay, wala makasinati og pagbaha ang duha ka barangay bisan pa man sa pagbunok sa niaging mga adlaw.

Si Engr. Christine Homez, ang City Planning and Development Coordinator, nagtuo nga daku ang natabang sa ilang senemana nga pagpanglimpyo sa mga kanal ug sa kasapaan.

Nunot niini si Mayor Gerald Anthony “Samsam” Gullas Jr. nimando sa pagpanglimpyo sa matag semana ilabi na gyud sa mga kanal ug sapa.

Nanghinaut si Homez nga padayonon nila ang programa aron dili na gyud mabalaka panahon sa ting-uwan ug ang mga tawo dili na magpataka og labay sa ilang basura. (Romeo T. Limpangog, Gabriel C. Bonjoc/GMR)(BANAT NEWS)