CEBU, Philippines — Gisugdan kagahapon ang inspection sa mga quarry sites sa Lalawigan sa Sugbo.
Kini human nasayran sa Kapitolyo base sa gihimo nga aerial site sa mga quarry nga adunay kalapasan sa permit nga giisyu kanila sa Kapitolyo sa niaging administrasyon. Matud ni Gobernador Gwendolyn Garcia nga tulo ka teams ang nisuroy sa mga quarry sites ug gipaabot niya nga mahuman ang inspeksyon sulod sa usa ka semana. Atol sa pakigtigum sa gobernador sa mga quarry operators lakip na sa sand and gravel ug holder sa special disposal permit, giawhag ang mga hingtungdan nga magbutang og marker sa ilang mga sites.
Sumala sa gobernador nga kun makita nga adunay discrepancy nagpasabot nga adunay kalapasan ug dili igo ang gibayad ngadto sa Kapitolyo ug kalapasan sa giisyu nga permit. Matud ni Garcia nga iya usab gipahibawo sa mga operators nga i-recompute sa Kapitolyo ang presyo sa matag cubic meter nga makuha nga limestone.
Ang gipabayad karon sa probinsiya mao ang P20 matag cubic meter sukad pa niadtong 2008.
Ang Kapitolyo mo-recompute niini base sa consumer price index sa tuig 2018.
“We will get the difference and we will add that on the 20 pesos,” matud ni Garcia. (GMR) (BANATNEWS)