CEBU, Philippines — Ang kapolisan mipasidaan sa katawhan bahin sa pagsulbong sa mga krimen nunot niining pagsugod na sa gitawag og “ber months” nga nagpasabot nagkaduol na ang kapaskohan.
Gipahinumduman sa kapulisan sa Dakbayan sa Talisay ang katawhan ug ang mga nagdumala sa mga establisemento nga magmatngon sa ilang seguridad kay diha sab nga buwan mosiaw ang mga dautang elemento nga gustong mamiktima sa uban.
Si Police Captain Nazarino Emia, deputy chief sa Talisay City Police Station nagkanayon nga tinuod nga angayang matag adlaw gyud mag-amping ang katawhan sa mga mapahimuslanon apan lahi ang buwan nga may katapusang ‘ber.’
Matud niya nga niini nga mga buwan magsugod ang dinagko nga transaksyon sa salapi sa mga bangko o bisan ang katawhan adunay daghang kwarta.
Siya nagkanayon nga ila pang doblehon ang ilang police visibility aron mataha ang mga kriminal paghimo og krimen.
Gawas pa niana, paspas sab nga makaresponde ang kapolisan sa unsa mang matang sa alarma kun diha sila sa kadalanan.
Pakighinabion pa ni Emia ang mga tagdumala sa mga establisemento ug balay patigayon sa siyudad aron susihon ang ilang mga security equipment sama sa CCTV ug alarm system kun operational pa ba.
Giawhag sab niya ang publiko nga mokooperar sa kapolisan batok niining mga dautang element nga masigpatan diha sa kadalanan pinaagi sa pagpahibalo dayon ngadto kanila aron mapakgang sila ug way mabiktima. (/IBM)(BANATNEWS)