CEBU, Philippines — Gisugdan na sa Mactan-Cebu International Airport Authority ang pagtrabaho sa terminal sa airport sa Isla sa Bantayan.
Matud ni Atty. Steve Dicdican, general manager sa MCIAA, nga naggahin sila og dili mominus P24 milyones alang sa pag-develop sa maong tugpahanan.
“Terminal ang among giuna then runway ang mosunod,” matud ni Dicdican.
Sa pagkakaron ang runway sa tugpahanan sa Bantayan moabot ra sa 900 metros ug plano sa MCIAA nga patas-an kini ngadto sa 1.2 kilometros.
Matud ni Dicdican nga dugangan pa nila ang pundo sa development sa terminal.
Si Gobernador Gwendolyn Garcia nagkanayon nga kun maayo na ang airport sa Bantayan makapalambo kini og samot sa turismo sa isla.
“Karon pa-pave na ang runway unya, duna na gyud tay decent nga terminal so ang tourism industry nato, mo-boom na sad ngari sa Bantayan kay developing that airport makes more accessibility to the island of Bantayan. Gawas sa positibong epekto niini ngadto sa turismo, makatabang usab kini kun adunay emergency. During typhoon ba ron nga maglisud og cross sa dagat, naay available, ang airport,” matud ni Garcia.
Siya nidugang nga nalipay siya tungod kay dili na kinahanglan pa mogasto ang Kapitolyo alang sa pag-develop sa maong airport. (/GMR)(BANATNEWS)