CEBU, Philippines – Patay ang usa ka 70-anyos nga lalaki human kini giingong niinom og malatathion insecticide nga giparisan og bino human sila nag-away sa iyang asawa diha sa Barangay Cantabaco, Dakbayan sa Toledo kagahapon sa buntag.
Si Marciano Trazon, usa ka kanhi heavy equipment operator giingong naabtan kini diha sa sulod sa kwarto sa ilang balay nga nagbuwa na ang baba.
Ug giingong wala na kini gidala sa iyang mga paryente ngadto sa tambalanan gideretso nalang kini diha sa punerarya. Sa imbestigasyon sa kapolisan sa siyudad nakaplagan diha sa kiliran ni Trazon ang usa ka botelyang bino ug usa ka botelyang malathion nga kinuhaan na.
Gituohang gipares kini og inom ni Trazon ug gibana-bana nga kaadlawon pa kining namatay apan gipaabot pa karon ang resulta sa autopsy sa patay’ng lawas niini.
Matud sa desk officer sa Toledo City Police Station, Police Staff Sergeant Reyno Allego nga wala nagkasinabtanay si Trazon ug ang iyang asawa niadtong Martes sa gabii.
Ang asawa ni Trazon nilakaw kini tungod kay wala kaagwanta o nilikay sa ilang lalis apan sa pagbalaik niini kagahapon sa buntag naabtan na ang iyang bana nga wala nay kinabuhi. Matud ni Allego nga giingong panahon nga matag-away ang magtiayon si Trazon manghulga kini nga maghikog, moinom og malathion ug wala magdahom ang asawa nga tinud-on sa iyang bana ang maong hulga. (/BDB)(BANAT NEWS)