CEBU, Philippines — Walay klase ug walay trabaho sa Dakbayan sa Mandaue sa Agosto 30 atol sa pagsaulog sa ika-50 nga Charter Day Anniversary.
Kini pinasikad sa proklamasyon nga giluwatan ni Presidente Rodrigo Duterte isip tubag sa hangyo sa konseho sa dakbayan nga ideklarar ang Agosto 30 nga non-working holiday sa siyudad.
Ang proklamasyon gipirmahan ni Executive Secretary Salvador Medialdea diin gitumong sa paghatag og kahigayunan sa mga Mandauehanon sa pagpakighiusa sa maong kasaulogan pinaagi sa pagtambong sa giandam nga nagkadaiyang kalihukan sa kagamhanan.
Ang mga gihan-ay nga kalihukan naglakip sa pagbukas sa food park sa Heritage Plaza nga nahimutang sa atubangan sa City Hall diin nagkadaiyang matang sa mga pagkaon ang ibaligya sama sa kaugalingong produkto sa siyudad nga tagaktak, masarial, bodbod ug bibingka.
Ang Dakbayan sa Mandaue nahimong siyudad pinasikad sa Republic Act 5519 nga gipirmahan ni kanhi Presidente Ferdinand Marcos.
Ang Dakbayan sa Mandaue usa na sab ka lone congressional district buwag sa ikaunom nga distrito sa Lalawigan sa Sugbo human aprobahi ni Presidente Rodrigo Duterte ang balaud sayo niining tuiga. (GMR) (BANATNEWS)