Kapitolyo di na mogasto og dugang sa CPDRC

CEBU, Philippines — Wala nay plano si Gobernador Gwendolyn Garcia nga magtukod og dugang pasilidad sa Cebu Provincial Detention and Rehabilitation Center.

Kini isip tubag sa tinguha ni Bise Mayor Michael Rama nga iipon ang mga piniriso sa Cebu City Jail ug CPDRC diin ibutang sila sa usa ka pasilidad gawas sa Dakbayan sa Sugbo.

“Dagku kaayo ta gasto, we are already spending so much sa CPDRC maintaining 2,500 inmates unya pun-an pa gyud na nato?” matud ni Garcia.

Hinoon matud ni Garcia nga ang CPDRC angay kining i-operate sa Kapitolyo sanglit anaa man kini sa balaud apan mahimo ra sab nga i-operate sa ubang ahensya.

Sama sa rehabilitation center sa Lungsod sa Pinamungajan nga gitukod sa usa ka telecom company apan gi-turnover ni Garcia ngadto sa Department of Health.

Gani sumala sa gobernador nga aduna pay pipila ka pasilidad nga gidumala sa Kapitolyo ang gusto niya nga i-turnover sa Department of Social Welfare and Development (DSWD).  “Because spending to other facilities that are not really our primary responsibility is for me a not so judicious use of provincial funds which we could spend better in a way nga mas maka-benepisyo ang atong mga kaigsoonan didto sa mga lungsod ug barangays,” matud ni Garcia. (/GMR)(BANATNEWS)