CEBU, Philippines — Usa ka polis nga nadestino sa Talisay City Police Station ang mitahan sa iyang kaugalingon ug miangkon nga siya maoy mipusil patay sa 71- anyos nga Japanese National didto sa Dakbayan sa Toledo niadtong Domingo sa buntag.
Giila ni Police Brigadier General Debold Sinas, direktor sa Police Regional Office-7 ang maong polis nga si Patrolman June Zamora, police investigator sa Talisay City Police Station.
Didto mitahan sa ilang estasyonan sa Talisay niadtong Domingo sa hapon si Zamora.
Nasayran nga niadtong Domingo sa buntag napalgang patay ug adunay samad pinusilan ang Hapon nga si Akira Togo diha sa Sitio Climaco Extension, Barangay Poblacion sa maong dakbayan.
Sumala pa sa direktor nga away sa yuta ang hinungdan sa pagpusil sa maong polis sa biktima. Giingong si Zamora mao ang karelasyon sa igsuon sa kanhi kapuyo sa maong Hapon.
Matud pa nga kaniadto, adunay gipalit nga yuta ang maong Hapon alang sa pamilya sa kapuyo niini, karon nga nagbuwag na ang duha buot unta nga kuhaon sa pamilya sa babaye ang maong yuta apan di mosugot ang maong langyaw.
Giingong miapil sa away si Zamora ug sa dihang nagkalalis giingong gihinganlan kini sa Hapon nga kurap hinungdan nga napusilan niya kini ginamit sa iyang armas.
Apan gitin-aw sa direktor nga mitug-an si Zamora nga dili service firearm sa PNP ang iyang gigamit sa krimen.
“Niangkon siya sa crime and ang ingon niya is dili daw niya intention to kill ang Japanese,” sigun ni Sinas.
Matud pa nga anaa sa ilang kustodiya ang maong polis ug magatubang kini og kasong kriminal ug adminsitratiba diin hayan maoy makapataktak niya sa serbisyo.
Si Sinas miingon nga dako ang iyang pagkadismaya nganong nagpadala sa emosyon ang maong polis ug gisayangan niini ang iyang karera pagka-polis tungod lang niini. (IBM) (BANATNEWS)