CEBU, Philippines — Nalandig sa tambalanan nga walay panimuot ang barangay konsehal sa Togonon, Dakbayan sa Danao ug grabe usab nga naangol ang iyang ig-agaw nga iyang gikaaway alas 10 pasado sa niaging gabii sa Sitio Camansi sa nahisgutang barangay.
Si Police Master Sergeant Mark Anthony Manulat sa Danao City Police Station niila sa maong barangay konsehal nga si Elvy Capin, 44-anyos, ug ang grabe nga naangol nga iyang ig-agaw mao si Jovy Barbero, 30-anyos, pulos nagpuyo sa maong dapit.
Matud ni Manulat nga ang duha pulos nakainom og ilimnong makahubog ug nagkalalis nga nisangko sa pagtigbas ni Capin gamit ang sundang nga maoy hinungdan sa mga samad tinigbasan sa bukton sa ig-agaw niini.
Dugang pa ni Manulat nga nakabawos sa pagsumbag si Barbero ngadto kang Capin nga maoy hinungdan sa pagkatumba ug napantok ang ulo ngadto sa sementadong karsada hinungdan nga nakuyapan.
Si Manulat niingon nga ang duha dali nga gidala sa Cebu Provincial Hospital-Danao City sa ilang mga kabanay apan gibalhin sa Vicente Sotto Memorial Medical Center alang sa dugang pag-atiman sa mga doktor.
Gitataw ni Manulat nga base sa ilang imbestigasyon maoy ilang nasuta nga ang duha adunay karaang panagbikil nga ilang nahisgutang sa ilang panag-inom nga nisangko sa mainiton nga panaglalis dihang pulos na sila hubog. (/GMR)(BANATNEWS)