DOH nipahimangno batok sakit sa ting-ulan

CEBU, Philippines — Gipahimangnuan sa Department of Health ang publiko nga magmatngon sa sakit nga posibleng makuha sa panahon sa ting-ulan.

Ang kasagarang mga sakit sa panahon sa ting-ulan sumala sa DOH naglakip sa diarrhea, mga sakit nga dala sa tubig sama sa typhoid fever, cholera, leptospirosis ug mga sakit sama sa malaria ug dengue.

Awhag sa DOH nga pirmeng himsog aron dili daling mataptan sa mga sakit ingon man ang pagbansay sa personal nga kalimpyo ug sa palibot.

Ang mga sakit sama sa diarrhea, typhoid fever ug kolera mahimong malikayan pinaagi sa pag-inom sa tubig gikan sa luwas nga tinubdan apan kung dili segurado mas maayo nga pabukalan sulod sa tres minutos. Kanunay sab nga gitambag sa DOH nga ang pagkaon kinahanglan kanunay lutoon nga maayo ug kinahanglan tabonan aron malikayan ang kontaminasyon sa mga langaw ug uban pang mga insekto.

Kinahanglan sab nga kanunay hugasan ang kamot ug sabon sa wala pa ug pagkahuman gamit sa banyo.

Gitambagan ang mga tawo nga mag-amping pag-ayo sa pagkaon ug pagdumala niini tungod kay kini nga mga sakit kanunay nga moabot labi na sa panahon sa ting-ulan kung diin kini lagmit nga mokaylap ug modaghan. (/GMR)(BANATNEWS)