‘Tulisan’ gipatay, gibitay sa taytayan

CEBU, Philippines — Gibitay nga wala nay kinabuhi ang usa ka lalaking gidudahang tulisan diha sa taytayan sa South Road Properties (SRP) habig sa Isla Verde, Barangay San Isidro, Dakbayan sa Talisay kagahapon sa kaadlawon.

Ang biktima nailhan nga si Reynante Otero, 44, taga Sitio Ilang-ilang, Barangay San Isidro sa maong siyudad.

Usa sa mga residenti sa lugar nibutyag nga nakadungog sila og sunod-sunod nga buto sa armas nianang kaadlawon apan gumikan sa ilang kahadlok wala sila nisusi sa gawas.

Apan dunay laing batan-ong lalaki ang nigawas sa ilang pinuy-anan aron mangihi ug maoy nakakita sa lalaking nagbitay sa taytayan atol sa iyang paghangad. Dali siya’ng mibalik ug mipahibawo sa iyang ginikanan sa iyang nakita.

Niabot ang mga sakop sa Emergency Response Team (ERT) apan wala dayon kini makahiling sa patay’ng lawas tungod kay nagbitay man kini.

Ang dagway sa biktima giputos sa puti nga masking tape, nahubo na ang purol niini nga maoy gigamit paggapos sa iyang mga kamot ug tiil.

Si Kapitan Adelaida Restauro sa San Isidro miingon nga ilado ang biktima nga notadong pusher sa ginadiling drugas ug nalambigit kini sa mga kaso sa pagpanulis diha sa ilang dapit.

Si Police Captain Nazarino Emia, deputy chief sa Talisay City Police Station miingon nga bisan sila nangita sa biktima tungod kay siya maoy subject sa buy bust operation niadtong Abril 1 ning tuiga.

Gani niadtong Pebrero tuig 2017 nasikop na si Otero sa Siyudad sa Sugbo gumikan kasong pagpanulis. Padayon pa ang kapulisan sa pagsusi sa maong hitabo.

Si Talisay City Mayor Gerald Anthony “Samsam” Gullas sa iyang post sa Facebook mipahibalo nga iyang awhagon ang kapolisan sa siyudad nga imbestigahon ang maong kaso.

Ang direktor sa Police Regional Office-7 nga si Police Brigadier General Debold Sinas miingon nga di vigilante ang naghimo sa maong krimen tungod kay walay gibiling notisya ang mga mamumuno.

“It’s not (vigilantes) kasi kung work ng vigilante na, naa untay mga sulat-sulat nga vigilante, o gibuhat sa vigilante, wala man puy niangkon,” matud pa ni Sinas.

Gipasalig ni Sinas sa mga taga Talisay nga way vigilante sa maong siyudad.

“Basin naa siya gipang-utangan nga mga big time nga mga pushers so basin og gisingil siya wala siya nibayad,” dugang pa sa heneral. (BANAT NEWS)