P700 mil kantidad sa butane nasakmit

CEBU, Philippines — Nikabat ngadto sa P700 mil ang kantidad sa mga butane ug kagamitan ang nasakmit sa kapolisan diha sa Lower Linao, Barangay Linao-Lipata, Lungsod sa Minglanilla niadtong Biyernes sa gabii.

Naatlan sa mga kapolisan pinangulohan ni Police Captain June Tabigo-on nga nag-refill sa mga butane canister ang mga trabahante nga sila si Elmer Salvado alyas "Mer", 23,  taga Barangay San Isidro, Siyudad sa Talisay; Bergolen Albios alyas "Vergel", 23 ug  Elmer Padayao alyas "Emer", 28, pulos nagpuyo sa Barangay Maghaway, Siyudad sa Talisay.

Si Police Sergeant Junyl Ater sa Minglanilla Police Station nibutyag nga nakadawat sila og report kabahin sa maong ilegal nga kalihukan hinungdan nga ilaha kining gironda.

Nasakmit gikan sa mga suspetsado ang 24 ka super tank LPG; duha ka butane refilling machine; duha ka compressor tank; 1,392 ka butane nga adunay sulod; 2000 ka butane canister nga walay sulod ug digital weighing scale.

Ang mga dinakpan mag-atubang og kasong kalapasan sa Presidential Decree (PD) 1865 sa pag-refill og mga butane.

Gikataho nga kasagaran sa nahitabo nga sunog diha sa nagkalain-laing dapit mao ang paggamit og butane sa pagluto. (/BDB)(BANATNEWS)