Grasya alang sa mga binilanggo
CEBU, Philippines – Nabanhaw kagahapon ang Cebu Dancing Inmates sa Cebu Provincial Detention and Rehabilitation Center (CPDRC) dihang mibisita si Gobernador Gwen Garcia uban si Cebu Provincial Police Office Director Roderick Mariano.
Gihinabi ni Garcia ang mga priso ug gisuta ang ilang kahimtang. Nakita niini nga naghuot na gyud ang binilanggo sa sulod hinungdan nga siya makig-alayon og mga abogado gawas sa Public Attorney’s Office aron masulbad ang kahuot sa maong pasilidad.
Nasayran nga maka-akomodar ra unta og 1,600 ka inmates ang CPDRC apan sa kasamtangan milapas kini.
Gawas niini, hatagan niya og bag-ong senina ang tanang priso human niya nakita nga pus-aw na ang ilang gipanul-ob.
Gimanduan ni Garcia si Bernard Calderon, ang officer-in-charge sa Provincial Services Office sa pag-request og bag-ong panapton alang sa mga priso.
Pahatagan usab sa gobernadora og mga bag-ong sapatos ang mga inmates dihang iyang nakita nga wala silay mga tarong hapin sa ilang mga tiil dihang nanayaw.
Ipabalik usab niini ang paghatag og mga passbook aron matarong og hipos sa mga prios ang ilang mga kinitaan gikan sa ilang mga gimugna nga handicrafts ug uban pa nga mahalin.
“Kay bisan og naa mo diri sa sulod nikita baya gihapon mo”.ni Garcia pa.
Lakip usab nga bag-ohan ang mga bedsheets, habol ug punda ang clinic ug papintalan usab sa gobernador ang mga building sa maong pasilidad. (/DILT)(BANAT NEWS)
- Latest
