Rota sa BRT Project giusab
CEBU, Philippines – Sa katapusang bahin niining tuiga masugdan na ang konstruksiyon sa phase 1 sa Bus Rapid Transit apan duna nay pipila ka kausaban sa orihinal nga rota.
Kini maoy gipahibawo ni Presidential Assistant for the Visayas Michael Dino.
Magsugod kini sa South Road Properties paingon sa Osmeña Boulevard agi sa dalan Escario liko sa may dalan Asilo paingon sa Cebu I.T. Park ug dili na molahos sa Talamban.
Kahinumduman nga gisupak kaniadto ni Dino ang pagpatuman sa BRT Project apan karon iyang gipasabot nganong suportado na niya kini.
Gipasabot ni Dino nga ang iyang pag-uyon na sa proyekto tungod kini sa gihimo nga realignment dihang iyang giklaro sa mga consultants sa Department of Transportation.
Gipaabot nga sa tuig 2021 dunay mahitabo partial operability sa tanang mode of transport.
Hinoon bisan og nausab ang plano sa BRT Project wala nausab ang budget niini nga naa sa P17-billion.
“We work on the same budget kay di naman na nimo pwede ipasaka ang budget, we work sa kana lang nga budget at the same time naa tay road right of way acquisition for the rota gyud,” dugang ni Dino.
Nasayran ang BRT Project dunay 21 ka stations ug sigun sa chairman sa Regional Development Council 7 nga si Kenneth Cobonpue nga ang first phase sa BRT magsugod sa SRP paingon sa Capitol area. (/GMR)(BANAT NEWS)
- Latest
