CEBU, Philippines – Gibati og kabalaka ang mga tanod sa Barangay Lagtang, Dakbayan sa Talisay human sila nakadawat og report nga ang igsuon sa babaye nga napalgang patay giingong manimawos kanila.
Kini maoy gitug-an ni Kapitan Chester Salcedo, kapitan sa maong barangay.
Matud ni Salcedo nga nagtuo ang igsuon ni Arshiela Caballero, 27-anyos nga iyang mga tanod ang nagpatay niini.
Si Salcedo nipasabot nga igo lang gidala sa iyang mga tanod si Caballero ug gitugyan kini ngadto sa kapolisan sa siyudad tungod kay gipasanginlan kining nangawat.
“Ang estorya ani nga ang igsuon ni Arshiela nga lalaki nagtago-tago ni kay nakapusil. Unya ang problema kay wala mi kaila sa dagway ani basin unya tinud-on ang bahad’, padayag ni Salcedo.
Matud ni Salcedo nga itaho nila ngadto sa kapolisan ang maong bahad batok sa iyang mga tanod.
Sa nasayran, ang patay’ng lawas ni Caballero napalgan kini nga adunay samad pinusilan sa dughan diha sa Barangay Cuanos, Lungsod sa Minglanilla niadtong Miyerkules sa buntag.
Ang mga paryente sa biktima niangkon nga sakit niini ang pagkahilabtanon ug giingong kong makakwarta kini sa iyang pagpangawat mobangka kini og kaon ug inom sa mga silingan.
Si Police Major Orlando Carag, Jr., hepe sa kapolisan sa maong siyudad nibutyag nga niabot na sa kapin sa 20 ang nangreklamo batok kang Caballero apan makabuhi kini gumikan sa dokumento nga iyang ipakita nga aduna siya’y deperensiya sa pangisip ug dili usab interesado nga mokiha ang mga reklamante. (/BDB)(BANAT NEWS)