CEBU, Philippines — Tun-an pagbalik sa konseho sa Dakbayan sa Talisay ang ordinansa nga nagmando sa tanang establisamento nga magbutang og Close Circuit Television (CCTV) camera.
Kini human si Bise Mayor Alan Bucao gipahinumduman ni mayor Gerald Anthony “Samsam” Gullas sa ka importante niini batok sa kriminalidad diin makuha sa footage sa CCTV ang mga nahitabo sa maong establisamento.
Giangkon ni Bucao nga ang ordinansa labot niini naaprobahan niadtong tuig 2010 apan wala kini estriktong napatuman.
Gibutyag ni Bucao nga adunay pipila ka negosyante nga nibutang og CCTV sa ilang establisamento isip proteksiyon sa ilang negusyo.
Atol sa ipahigayong regular session sa konseho karong adlawa ilang susihon ang provision sa ordinansa aron masuta kong aduna ba kini usbon og wala.
Hinuon usa sa nakita ni Bucao nga angay nilang usbon mao ang pagpa-upgrade sa camera nga tin-aw ang kopya sa video niini ug kinahanglan nga paaboton pa ang pipila ka adlaw una papason ang footage nga nakuha. Diin tumong niini nga magamit ang footage kon adunay disgrasya, krimen o uban pang panghitabo sa palibot. (BANAT NEWS)