13 estudyante nag-mass hysteria

CEBU, Philippines — Naputol ang klase sa Can-asujan National High School sa Dakbayan sa Carcar human nga 13 sa ilang mga tinun-an ang giingong “nasudlan” og dautang espiritu ug gidala silang tanan sa Carcar District Hospital.

Apan ang chairman sa Peace and Order and Public Safety sa Dakbayan ug pangulo sa City Disaster Jonathan Jay Garcia niklaro nga nag hyperventilation lang ang mga tinun-an.

Ang uban kanila mga dancers nga nisayaw niadtong Sabado sa gabie atol sa kalihukan sa siyudad subay sa Charter Day Celebration.

Matud pa ni Garcia, ang Can-asujan National High School, nahimutang tulo ka kilometro gikan sa Carcar City Hall ug human nila nadawat ang alarma alas 11. Sumala pa ni Garcia, adunay estudyante nga dancer sa Festival of Festivals nga nag hyperventilation human kini naglisod ug ginhawa nga nakatakodtakod sa ubang tinun-an tungod gipalutaw sa estorya-estorya nga dunay ‘dili ingon kanato’ sa punoan sa dakit diin sila nag-estambay.

Dako ang pagtuo ni Garcia, tungod sa kakapoy ug kulang sa pahulay maoy hinungdan sa paghangos sa mga bata ug dili tungod kay nasudlan ug dautan nga espiritu.

Tungod sa nahitabo gikanselar usab ang klase sa maong tulonghaan aron dili pa kini makamugna ug kalisang pa ubang mga tinun-an. (BANAT NEWS)