CEBU, Philippines — Gipasabot ni Gobernador Gwendolyn Garcia nga kinahanglan mag-downsize og mga personnel sa mga provincial ug district hospitals.
Gipakita sa gobernador ang listahan sa mga empleyado sa mga tambalanan sa probinsiya diin gihulagway niini nga nanubra kini. Matud niya nga basi sa standard sa Department of Health, mag depende sa bed capacity sa usa ka tambalanan ang doktor ug medical staff.
Gihimong sanglitanan ni Garcia ang mga medical personnel sa Pinamungajan District Hospital nga usa ka 10-bed capacity facility. Giingong tulo ra unta ka doktor ang ibutang sa maong tambalanan apan ang kanhi administrasyon mibutang og unom.
Sa Bantayan District Hospital nga usa ka 25-bed capacity, lima ra unta ka doktor ang ibutang apan sa miaging administrasyon miabot sa 10 ka doktor ubos sa contract of service. Ang mga nurse, 13 ang plantilla position diin walo lang ang bakante apan kaniadto aduna kini 27 ka Job Order (JO) nurses. Sa admin office sa maong tambalanan,18 ang plantilla diin 12 ang bakante apan ang JOs niabot og 28.
Sa Cebu Provincial Hospital - Carcar, ang medical service, 28 ang plantilla, lima na ang filled-up apan moabot sa 59 ang contract of service. Sa nurses, 63 ang plantilla, 15 na ang na filled-up, adunay bakante nga 48 apan miabot sa 109 ang gi-hire nga JOs.
Nunot niini, gikonsiderar sa gobernador nga i-outsource ang medical personnel aron ang service provider maoy mangita kon pila ra ang bakante nga posisyon nga kinahanglan pasudlan. Mas makadaginot usab niini Kapitolyo kon itandi sa pagkuha og mga doktor nga moabot sa P80 mil ang sweldo matag usa.
Nahinabi na sab ni Garcia ang mga chief of hospitals ug iyang gimanduan nga kinahanglan ayohon ang scheduling sa mga doktor.
Sa panahon ni Bise Gobernador Hilario Davide III, nang-hire kini og daghang trabahante sa mga tambalanan. Matud niya nga ila kining gituyo pagsiguro nga adunay available panahon sa emerhensiya diin by shifting ang duty sa mga medical personnel.
Si Davide nagkanayon nga "prerogative" ni Garcia kon i-downsize niya ang mga medical staff, ang importante dili mabiyaan ang mga tambalanan. (BANAT NEWS)