Guardo mopasiugda sa online request

CEBU, Philippines — Nagplano ang chairman sa committee on infrastructure sa konseho sa Siyudad sa Sugbo, Konsehal Jerry Guardo, nga mohimo og online portal alang sa Department of Engineering and Public Works (DEPW) aron pag-akomodar sa declogging ug footpaths request online.

Matud ni Guardo nga tumong niya ang paperless request gikan sa publiko. Ang paghimo og page alang sa DEPW aron pag-atiman sa request nga matud pa mas “interactive” itandi sa pagpadala og letter request sa mga concerned offices.

Gawas niini, sayon nalang sab alang nila ang pag-track sa number sa declogging ug footpaths requests matag karon ug unya. Sukad 2018, ang buhatan ni Guardo gitahasan sa pagtan-aw sa operasyon sa declogging ug delivery sa footpaths sa kabarangayan.

Sa pag-declog sa drainage, kanal ug kasapaan si Guardo niumol og “Menos Baha Task Force” nga maoy moresponde dayon sa request.

Sa dul-an siyam ka buwan sa pag-implementar niini nakaani sila og positibong feedbacks gikan sa mga residente sa siyudad. Subay niini, alang sa long-term solution pagtubag sa baha, lingkuran nila ni Guardo, DEPW ug Mayor Edgardo Labella aron pagtuki sa proposed drainage master plan sa usa ka firm sa kaulohan.

Ang Department of Public Works and Highways (DPWH) maoy nipundo sa pagtuon. (/GMR)(BANATNEWS)