CEBU, Philippines — Nagtingkagol karon ang tulo ka mga mananagat nga nasakpang nanguha og pawikan sa kadagatan sa Barangay Cawhagan, Dakbayan sa Lapu-lapu niadtong Sabado sa buntag.
Ang mga gidakop sa Maritime Police giila nga silang Darami Radja,50, si Brayan Alim ,31; ug si Julius Asamsa, 49, sila pulos mga residente sa Sitio Puntod, Barangay Mambaling, Dakbayan sa Sugbo.
Matud pa sa Assistant Operation ug Assistant Station chief sa 701st Maritime Police nga si Police Captain John Rey Cutab, nagpahigayon sila og seaborne patrol operation sa lugar dihang ilahang nasigpatan ang usa ka puti nga bangka nga nanagat sa dapit.
Ilaha kining giduol apan nakabantay sila nga adunay giitsa sa dagat ang usa sa mga mananagat hinungdan nga dali nila kining gipadul-an ug maayo nalang nga wala pa motidlom sa dagat ang ilang giitsa nga usa diay ka pawikan.
Didto na nadeskobrehan sa mga otoridad nga patay na ang maong pawikan ug aduna kini samad dinunggaban sa bukobuko. Tungod niini, gidakop dayon ang tulo ug gidala sa ilang buhatan.
Nasakmit gikan sa maong grupo ang bangkaw, pana ug mga improvised diving equipment nga maoy gigamit sa grupo sa ilang panagat.
Niini, lig-on ang ilang pagtuo nga mga pawikan gyud ang target nga pagdakpon sa maong grupo.
Butyag sa maong hepe nga nakadawat sila og pipila ka mga report gikan sa mga volunteers sa coastal barangay nga aduna gihapoy managat og pawikan sa maong lugar.
Wala pa hinuon matino kun asa dalhon sa maong grupo ang pawikan nga ilang makuha.
Apan base sa mga impormasyon nga nadawat sa mga lokal nga fishing clubs sa Sugbo gikan mismo sa mga lokal nga mga mananagat sa Cordova, Lapu-Lapu ug Olango Islands, adunay mga mananagat gikan sa Talisay City ug Cebu City nga tuyong moanha sa ilang kadagatan nga nagpakaaron-ingnong ordinaryong nanagat apan manguha diay og mga pawikan ug mga iho sama sa Lawihan (Thresher Sharks).
Kini bisan paman nga gidili na ang pagkuha niini ug makadaghan na silang giabog sa mga lokal nga mga mananagat. Ang maong mga iho ug pawikan gikatahong adto dad-on sa Talisay City diin adunay komprador nga mopalit niini ug maoy modala niini sa merkado sa Metro Cebu diin sekreto kining ibaligya sa mga kan-anan.
Niadto lang Disyembre 11, 2018 miabot ngadto sa 50 ka kilong sea turtle meat ang nakompiska sa mga ahente sa National Bureau of Investigation atol sa entrapment operation didto sa Barangay Pasil diin illegal nga gibaligya ang mga unod niini aron luto-on.
Niining pagsuwat, anaa pa sa kustodiya sa maritime police ang patay nga pawikan uban sa mga ebidensya.
Wala pa kini mahiling sa Department of Environment and Natural Resources (DENR) ang maong pawikan maong wala pa masayri kun pila na kini ka tuig.
Walay specific nga balaod nga nagpotektar sa matag usa ka matang sa marine wildlife sa kadagatan sa Pilipinas, apan adunay Republic Act 9147 o ang Wildlife Resources Conservation and Protection Act nga nagprotektar sa tanang matang sa mga marine wildlife nga gideklarar nga threatened ug exotic species nga nalatid sa Articles 2 ug 3 niini.
Samtang ang RA 8550 o Philippine Fisheries Code nagmando sa tanang ahensiya sa gobiyerno nga proteksyonan ang mga nihit ug nameligrong mahurot nga tamang sa marine wildlife ubos sa Section 11.
Ang manatee o dugong ingon man ang mga pawikan ug lumod sa Pilipinas apil sa mga gikonsiderar nga endangered marine wildlife sa Pilipinas. (/IBM)(BANATNEWS)