Kadalanan siradohan tungod sa oathtaking
CEBU, Philippines – Gipahimangnuan sa Cebu City Transportation Office ang mga mobiyahe karong Domingo nga planohon ang ilang mga lakaw aron malikayan ang kalangay kay sirad-an nila ang pipila ka mga kadalanan nga nagpalibot sa Plaza Sugbo sa Cebu City Hall, sugod sa alas siete sa buntag alang sa oathtaking sa mga bag-ong mga city officials nga pangulohan ni Mayor-Elect Edgardo Labella.
Naglakip nga sirad-an ang bahin sa Osmeña Blvd. gikan sa corner D. Jakosalem ngadto sa Lapu-Lapu St.; D. Jakosalem St. gikan corner sa Legazpi St. ngadto sa Osmeña Blvd; P. Burgos St. gikan corner Legazpi St. ngadto sa M.C Briones St. ug Magallanes St. gikan sa corner Lapu-Lapu ngadto P. Burgos St.
Ablihan kini inig human sa kalihukan ug bugtong kadtong mga adunay VIP access lang ang makasulod sa mga gisirad-an nga dalan.
Mo-implementar usab ang CCTO og re-routing ngadto sa mga PUJs.
Sa laing bahin, gipahibawo ni Tisa Barangay Captain ug Cebu City Councilor-Elect Phillip Zafra nga ugma, adlawng Biyernes mahitabo ang turnover sa mopuling kapitan sa barangay human siya midaug pagka-konsehal sa siyudad niadtong Mayo.
Pulihan si Zafra sa ilang first councilor nga si Renato Pacaña, samtang duha ang gipilian nga mopuli kang Pacaña, kini mao sila si Jessie Campos ug Ogherty Lopez kinsa nakauban nila pagdagan sa milabay nga barangay elections.
Apan sigon ni Zafra ang consensus sa kadaghanan mao si Campos kay gawas nga nalandig kini sa ikawalong pwesto, nasuheto na sab kini sa barangay operations.
Hinuon, gitan-aw ni Zafra nga makatabang gihapon si Lopez sa barangay o kaha sa information office sa siyudad.
Samtang si Mabolo Barangay Captain Niña Mabatid nga napili sab pagka-konsehal sa siyudad mibutyag nga mohimo sila og turnover human sa inaugural session.
Ang mopuli kaniya mao si Mabolo first councilor Frank Gajudo. Ang mopuli sa mabiyaang posisyon ni Gajudo mao ang ilang barangay administrator nga si Norman Alinio. (Decemay P. Padilla/DILT)(BANAT NEWS)
- Latest
