CEBU, Philippines — Iendorso sa Provincial Council for the Welfare of Children (PCWC) ngadto sa umaabot nga administrasyon ang pagtabang sa maong buhatan ngadto sa pamilya sa 9-anyos nga lalaki kinsa giingong gipatay human lubaga ang liog sa Lungsod sa Badian.
Matud ni outgoing Vice-Governor Agnes Magpale kinsa maoy co-chairperson sa PCWC nga misaad na sila nga motabang sa imbestigasyon hangtod nga makab-ot ang hustisya sa kamatayon ni Def Leppard Siclajon, ang biktima kinsa unang gikataho nga naghikog gamit ang duyan sa ilang panimalay sa Brgy. Malhiao sa Lungsod sa Badian.
Nasayran nga kasagaran nga kaso nga gitabangan sa PCWC may kalabotan sa pag-abuso sa kabatan-onan diin hatagan nila kini og abogado.
Ang PCWC ubos buhatan sa gobernador ug kay lahi naman ang gobernador sugod Hulyo, malaumon si Magpale nga mapadayon ang tabang ngadto sa pamilya ni Siclajon.
"I think the new administration will honor the commitment" matud ni Magpale.
Nasayran nga basi sa autopsy report sa National Bureau of Investigation-7, na-dislocate ang bukog nga maoy nagkonekta sa spine ug ulo sa bata ug giingong mahiagom kini kon adunay laing kusog nga mohimo niini.
Tungod sa maong kalambuan, giingong adunay foul play sa kamatayon sa bata. (BANAT NEWS)